Ciencia e turismo van da man no Parque Nacional das Illas Atlánticas de Galicia. Porque, como din os impulsores desta iniciativa, “non se pode protexer o que non se coñece”. Un consorcio de empresas multidisciplinar, reunidas ao redor do selo de calidade Observer de Turismo Científico, traballa no desenvolvemento e comercialización dun produto de turismo científico co- financiado pola Axencia Galega de Turismo.
O proxecto está pensado como estratexia de desestacionalizacióndo turismo neste enclave. Levará por nome “Mar de Ciencia” e comercializarase ao público en outubro. Trátase do primeiro paquete de turismo científico de varios días de duración pensado para coñecer as illas atlánticas dunha maneira diferente.
O Parque Nacional das Illas Atlánticas de Galicia situase nunha posición avanzada para o desenvolvemento do turismo científico, grazas sobre todo a unha intensa actividade de divulgación, un engarce axeitado no contexto socioeconómico local e un bo nivel de integración co profesional da investigación.
Neste contexto, o Parque Nacional Marítimo Terrestre das Illas Atlánticas de Galicia obtivo, en Maio de 2017, a cualificación de Destino Científico Observer, baixo a categoría de Reserva científica Observer®, específica para Parques Nacionais.
En base ao Informe da Auditoría Observer elaborado para o Parque Nacional, os principais recursos, agrupados por áreas científicas son: astronomía, xeoloxía, medio mariño, fauna e flora e ecoloxía.
“Co Turismo Científico búscase informar e achegar ao visitante á astronomía, botánica, fauna, paleontoloxía, arqueoloxía, xeoloxía, ecoloxía, etc. e, de paso, dar a coñecer a intensa labor de investigación que os científicos realizan para conservar e poñer en valor este patrimonio natural”, explican dende Observer: “O coñecemento e a difusión do mesmo son a base da conservación. Non se pode protexer aquilo que non se coñece”.